Сезне заман таләпләренә җавап бирерлек китаплар чыгаруда күпкырлы эшчәнлек алып барган һәм Россиядә иң эре милли нәшриятлардан саналган Татарстан китап нәшриятының веб-сайтында күрүемә шатмын.

Татарстан китап нәшрияты Интернетта үз сәхифәсен булдырды. Сайтның төп максаты – нәшриятта дөнья күргән яңа китаплар, уку-укыту әсбаплары, яңалыклар белән укучыларыбызны таныштырып бару, татар китабын гына түгел, республикабызда яшәүче башка милләт вәкилләренең дә китапларын пропагандалау.

Безнең нәшрият ул – әдәби әсәрләр иҗат итүче талантлы шагыйрь-прозаикларны, тәҗрибәле педагог һәм  галимнәрне, дәреслек авторларын, үз эшләрен яратып, җиренә җиткереп эшләүче төрле һөнәр ияләрен бергә туплаган оешма. Нәшрият инде 90 елдан артык төсле, матур бизәлешле, республикабыз халкы яратып укый торган һәм милләтебезнең горурлыгы булган басмалар чыгара.

Безнең коллективны яраткан хезмәтебез, туган ягыбызның тарихын һәм мәдәниятен саклауга, баетуга омтылыш, укучыларыбызга, халкыбызга хөрмәт, балаларга мәхәббәт берләштерә.

Татарстан китап нәшрияты – Россия Федерациясендә татар телен саклаучы, барыннан да элек милли китап чыгаручы бердәнбер дәүләт нәшрияты. Шуңа күрә без илебез һәм киләчәк буын каршында зур җаваплылык тоеп эшлибез.

Сайтыбыз һәркем өчен кызыклы һәм файдалы булыр дип ышанабыз. Биредә сез күңелегезгә хуш килгән китапларны күрә алырсыз, үзегезне борчыган сорауларга җаваплар табарсыз. Ә без исә үз чиратыбызда укучыларыбызны бай эчтәлекле, матур бизәлешле, заман таләпләренә туры килә торган яңа басмалар белән сөендерергә тырышырбыз.

Ихтирам белән,
Татарстан китап нәшрияты генераль директоры Д.С.Шакиров